Zinc တနေ့တာလိုအပ်ချက်

US. FDA ရဲ့ ပြဌာန်းချက်အရ အသက် (၄) နှစ်အထက် လူတယောက်မှာ Zinc ဓါတ်ကို တနေ့တာလိုအပ်ချက်က (၁၅) မီလီဂရမ်ဖြစ်ပါတယ်။ 

Zinc မချို့တဲ့ရအောင် Zinc ဓါတ်ကြွယ်ဝတဲ့အစားအစာများကို စားပေးသင့်ပါတယ်။

• သိုးသား၊ အမဲသား၊ ကြက်သား

• ဖရုံစေ့၊ ဟမ့်စေ့ (Hemp seed)၊ သီဟိုဠ်စေ့၊ ဗာဒံစေ့

• ကုလားပဲ၊ ပဲနီလေး

• ကိုကိုးအမှုန့်

• ဒိန်ချဥ် (သို့) ကီဖာ

• Ricotta ချိစ်

• မှိုအမျိုးမျိုး၊ ဟင်းနုနယ်ရွက်၊ ထောပတ်သီး စသည်တို့မှာ Zinc ဓာတ် ကြွယ်ဝစွာ ပါဝင်ပါတယ်။

Zinc ကို ဖြည့်စွက်စာအနေနဲ့ မှီဝဲမယ်ဆိုရင်တော့ တရက်မှာ (၄၀) မီလီဂရမ်ထက်ပို မသောက်သင့်ပါဘူး။

Zinc ဓာတ် လွန်ကဲပါက -

• အစာမကြေခြင်း

• ဝမ်းသွားခြင်း 

• ခေါင်းမူးခြင်း

• အန်ခြင်း များဖြစ်နိုင်ပါတယ်။

• Zinc ဓာတ်ကို ကာလကြာရှည်စွာ ပမာဏများများ မှီဝဲပါက Copper (ကော့ပါးဓာတ်) ချို့တဲ့ခြင်းကို ဖြစ်စေပြီး၊ ကော့ပါးဓာတ်ချို့တဲ့ပါက အာရုံကြောဆိုင်ရာ ပြဿနာများဖြစ်တဲ့ ခြေလက်များ ထုံကျင်ခြင်း၊ အားမရှိခြင်းများ ခံစားရနိုင်ပါတယ်။ 

• ကိုယ်ခံစွမ်းအားကျဆင်းနိုင်ပါတယ်။

• အမျိုးသားတွေမှာဆိုရင် ဆီးကျိတ်ကင်ဆာ ဖြစ်နိုင်ချေကို ပိုများစေပါတယ်။

Zinc နဲ့ ဓာတ်ပြုနိုင်တဲ့ဆေးများမှာ

• ပိုးသတ်ဆေးအချို့ - အချို့သော ပဋိဇီဝပိုးသတ်ဆေးများဟာ Zinc အားဆေးနဲ့ တွဲသောက်ရင် အာနိသင်လျော့တတ်လို့ ပိုးသတ်ဆေးနဲ့ Zinc အားဆေးနဲ့ ခြားပြီးမှ သောက်သင့်ပါတယ်။ ပိုးသတ်ဆေးကို Zinc မသောက်ခင် (၂) နာရီ အလို (သို့) ပိုးသတ်ဆေးကို Zinc သောက်ပြီး (၄) နာရီမှ (၆) နာရီထိ ခြားပြီးမှ သောက်သင့်ပါတယ်။

• လေးဘက်နာရောဂါအတွက် ဆေးအချို့နဲ့ Zinc တွဲသောက်ရင်လည်း ဓာတ်ပြုပြီး အာနိသင်ပြောင်းတတ်လို့ အချိန်ခြားပြီးမှ သောက်သင့်ပါတယ်။

• Thiazide လို့ခေါ်တဲ့ သွေးကျဆေး (သွေးတိုးသူတွေသောက်တဲ့ဆေး) သောက်သူတွေဟာ Zinc ဓာတ် ချို့တဲ့တတ်ပါတယ်။