လူအများစုအနေဖြင့် လိုအပ်တဲ့ ဖောလစ်အက်ဆစ်ပမာဏကို စားသုံးတဲ့ အစားအသောက်တွေကနေ လုံလုံလောက်လောက် ရရှိပါတယ်။

ဖောလစ် အက်စစ် ကြွယ်ဝသော အစားအစာများမှာ - တိရိစ္ဆာန်အသည်း၊ ပန်းဂေါ်ဖီ၊ သဘောင်္သီး၊ ရုံးပတီသီး၊ ပဲပိစပ်၊ ချဉ်သောအသီးများ (လိမ္မော်သီး၊ သံပရာသီး၊ ကျွဲကောသီး)၊ ပဲကြား၊ ထောပတ်သီး၊ ကညွတ်၊ ပန်းဂေါ်ဖီစိမ်း၊ ပဲကြီး၊ ငှက်ပျောသီး၊ ပဲအမျိုးမျိုး တို့ဖြစ်ပါတယ်။ တစ်ခုသတိထားရမှာက ဖောလစ်အက်ဆစ်ဟာ အပူကြောက်တဲ့အတွက် ဟင်းသီးဟင်းရွက်တွေကို အချိန်ကြာမြှင့်စွာ နွမ်းတဲ့အထိ ချက်ပြုတ်မယ်ဆိုရင် ဟင်းရွက်တွေမှာပါတဲ့ ဖောလစ်အက်ဆစ် ကို ပျက်စီးဆုံးရှုံးသွားစေပါတယ်။

ဖောလစ်အက်ဆစ် တနေ့တာ လိုအပ်ချက်များမှာ -

• မွေးစမှ - ၆ လအထိ - 65 mcg

• ၇ လ - ၁၂ လအထိ - 80 mcg

• ၁ နှစ် - ၃ နှစ်အထိ - 150 mcg

• ၄ နှစ် - ၈ နှစ်အထိ - 200 mcg

• ၉ နှစ် - ၁၃ နှစ်အထိ - 300 mcg

• ၁၄ နှစ် - ၁၈ နှစ်အထိ - 400 mcg

• ၁၉ နှစ် နှင့် အထက် - 400 mcg

• ကိုယ်ဝန်ဆောင် မိခင်များ - 600 mcg

• နို့တိုက်မိခင်များ - 500 mcg

ဖောလစ်အက်ဆစ်၏ အကျိုးကျေးဇူးများ-

• စိတ်ဖိစီးမှုများပြီး စိတ်ကျရောဂါ မဖြစ်အောင် ကာကွယ်ပေးခြင်း

• တချို့သော ကင်ဆာရောဂါများ (ရင်သားကင်ဆာ၊ အဆုတ်ကင်ဆာ၊ ပန်ကရိယကင်ဆာ စသည့်ကင်ဆာရောဂါများ) ဖြစ်ပွားမှုကို ကာကွယ်ပေးခြင်း

• သွေးအားနည်းရောဂါ ကာကွယ်ပေးခြင်း

• မှတ်ဉာဏ်ချို့ယွင်းခြင်း နှင့် အယ်လ်ဇိုင်းမားကဲ့သို့သော ရောဂါများအား ကာကွယ်ပေးခြင်း

• နှလုံးကျန်းမာရေးကို အထောက်အကူပေးခြင်း

• အရိုးများ သန်မာစေခြင်း

• ကိုယ်ဝန်ဆောင်များအတွက် ကောင်းကျိုးများပေးခြင်း

• ကိုယ်ဝန်ဆောင်ချိန်မှာ ကလေးကြီးထွားဖို့အတွက် ဖောလစ်အက်ဆစ်ကို ပိုလိုအပ်ပါတယ်။ ကျွမ်းကျင်ပညာရှင်တွေကတော့ ကိုယ်ဝန်မဆောင်မီ အနည်းဆုံး (၁) လအလိုလောက်ကတည်းက နေ့စဉ် ဖောလစ်အက်ဆစ် 400 mcg ကို ကြိုတင်သောက်သုံးသင့်တယ်လို့ အကြံပြုထားပါတယ်။ ကိုယ်ဝန်ဆောင်ချိန်မှာ ဖော်လစ်အက်စစ် သောက်သုံးခြင်းဟာ ကလေးရဲ့ ဦးနှောက်နဲ့ ကျောရိုးမကြီးတွေမှာ မွေးရာပါ ချို့ယွင်းမှုတွေ မဖြစ်အောင် ၇၀% ထိ ကာကွယ်ပေးပါတယ်။

ခန္ဓာကိုယ်တွင် ဖောလစ်အက်ဆစ်ချို့တဲ့နိုင်စေသော အကြောင်းရင်းများ-

• ဖောလစ်အက်ဆစ် ကြွယ်ဝတဲ့အစားအသောက်များ မစားခြင်း ၊

• အရက် အလွန်အကျွံသောက်ခြင်း ၊

• ကျောက်ကပ်ဆေးနေရသူများ ၊

• အူလမ်းကြောင်းတွင် ရောဂါရှိနေသူများ (ဥပမာ - Crohn’s disease, Celiac disease) ၊

• အတက်ရောဂါတွင် အသုံးပြုသော ဆေးများနှင့် ဖောလစ်အက်ဆစ်ကိုနည်းစေသော တခြား ဆေးများ သောက်နေသောသူများ (ဥပမာ- methotrexate, sulfalazine , Trimethoprim)